نظرية الثورة المضادة

تصميم الشخصية مقتنع بيه إلى حد ما، بس أبعاد الدماغ كبيرة شوية بالنسبة للجسم، متهيألي كانت محتاجة تصغر شوية.

الإيدين والرجلين عندي مشكلة كبيرة جدا فيهم، مستحيل اكمل رسمهم بالطريقة الزبالة دي.

فيه مأساه فنية في الرسمة اسمها التظليل، شغل زي الخرا، محتاج ادرس الناس بتظلل ازاي في رسوماتها.

الدليل المتين في طريقة التلوين

الفكرة العامة هو إنك تلون على طبقة شفافة فوق الرسمة بتاعتك، يعني من على برنامج "جيمب" بعمل طبقة layer جديدة فوق طبقة الرسمة اللي مسحتها على السكانر.

بس لو بدأت بالتلوين على الطبقة الجديدة مباشرة الخطوط اللي انت راسمها مش هتبان من تحت اللون، عشان كده لازم تخلي الطبقة من نوع multiply وتبدأ في التلوين مباشرة.

وهتكون النتيجة بعد التلوين كده:

التابليت

التابليت اللي اشتريته

مؤخرا ابتديت أجرب اختراع التابليت لأول مرة، واكتشفت انها مفيد جدا في التلوين لسببين:

- من حيث السرعة: لأني ببقى متحكم بشكل أحسن في حركة المؤشر على الشاشة، ومش بضطر اعمل زوم كتير واغير حجم الفرشاة.

- من حيث الكفاءة: لأني ممكن اتحكم في ضغطة القلم نفسها بحيث يتغير سمك الخط ومدى شفافيته تبعا لضغطة الإيد، وده فادني كتير في التظليل والإضاءة.

فرق معايا التابليت في التظليل والإضاءة

أما في التحبير، لغاية دلوقتي ماجربتش ارسم بيه رسمة كاملة، بس من اللعب كده بشكل عشوائي لقيته مش بطال، وان كان عندي مشكلة بسيطة، هي إني معرفش ارسم خط مضبوط -مش مهزوز- غير في اتجاهات معينة، يعني معنديش مشكلة في رسم خط أفقي كويس، انما الخطوط الرأسية ضايعة مني شوية وبالتالي بضطر أغير زاوية الورقة عشان اعرف ارسمها، وده ما ينفعش في التابليت، لو غيرت زاويته بتلغبط في الاتجاهات ومش بعرف اسيطر على حركة المؤشر قوي.

تجربة استخدمت فيها التابليت من البداية للنهاية

التابليت اللي اشتريته نوعه MANHATTAN وكان سعره 450 جنيه، لغاية دلوقتي شغال معايا كويس ومافيهوش مشاكل.

بس نقطة مهمة، عشان الناس اللي بتتعقد :) كل اللي بيتعمل بالتابليت ممكن يتعمل بالماوس، الفكرة هنا في السرعة والإنجاز.